बझाङमा कुटपिट गरी एक पुरुषको हत्या : एक जना नियन्त्रणमा

बझाङ । बझाङमा एक पुरुषको कुटपिटबाट हत्या भएको छ । जयपृथ्बी नगरपालिका वडा नम्बर ७ ज्वाडामा कुटपिट गरी पुरुषको हत्या गरिएको हो । ज्वाडाका ४७ वर्षीय पिरु भण्डारीको सोही वडाका दिपेन्द्र थापाले शनिवार राती करिब पौने ८ बजेको समयमा हत्या गरेको जनाइएको छ ।

कुली बाँधको घाटमा आगो तापी रहेका बेला दुबै जनाबिच सामान्य भनाभन हुँदा मृतक भण्डारीले आगोको अगुल्टोले हानेको र थापाले बाहिर ल्याएर कुटपिट गरेको प्रत्यक्षदर्शीले बताएका छन् ।

कुटपिटपछि घाइते भएका भण्डारीलाई शनिबार राती उपचारको लागी जिल्ला अस्पताल ल्याइएको भएपनि उपचारको क्रममा शनिबार राती नै मृत्यु भएको जिल्ला प्रहरी कार्यालय बझाङले जनाएको छ । भण्डारीलाई कुटपिट गर्ने दिपेन्द्र थापालाई नियन्त्रणमा लिई अनुसन्धान भइरहेको प्रहरी नायब उपरीक्षक ज्ञान बहादुर विष्टले बताउनुभयो ।