२०७८ साल असोज ९ गते शनिबार

तपाईँ सुन्दै हुनुहुन्छः

उपत्यकामा २७ गतेसम्म निषेधाज्ञा थप (आदेशसहित)

रेडियो नेपाल २०७८ साउन १९ गते १९:१६
file photo

काठमाडौँ । काठमाडौँ उपत्यकामा तालिम, सेमिनार, बैठक तथा गोष्ठी भर्चुअल माध्यमबाट मात्रै सञ्चालन गर्नुपर्ने गरी २७ गतेसम्म निषेधाज्ञा थप गरिएको छ । 


स्वास्थ्य मापदण्ड उल्लङ्घन हुँदा जोखिम बढ्न थालेको निष्कर्षसहित उपत्यकाका तीन जिल्ला (काठमाडौँ, ललितपुर र भक्तपुर) का प्रमुख जिल्ला अधिकारीसहित आजको बैठकले त्यस्तो आदेश दिएको हो । 


यसअघि गोष्ठी, तालिम, सेमिनार, बैठक तथा प्रशिक्षणजस्ता कार्यक्रम उपस्थित भएरै गर्नुपर्ने भएमा २५ जनाभन्दा बढी नहुने गरी सञ्चालन गर्न अनुमति दिइएकोमा कोभिड–१९ सङ्क्रमितको सङ्ख्या वृद्धि हुन थालेपछि यस्ता भिडभाडजन्य गतिविधि रोक्न भर्चुअल कार्यक्रम मात्रै गर्न भनिएको काठमाडौँका प्रमुख जिल्ला अधिकारी कालीप्रसाद पराजुलीले जानकारी दिनुभयो । 


आदेशमा कोभिड–१९ को लक्षण देखिएका तथा सङ्क्रमितको सम्पर्कमा रहेका व्यक्तिलाई नेपाल सरकारले निःशुल्क व्यवस्था गरेको एन्टिजेन तथा पिसिआर परीक्षणका लागि सम्बन्धित स्थानीय तह, जिल्ला अस्पतालसँग सम्पर्क गरी परीक्षण गराउन र भिडभाडबाट बच्न अनुरोध गरिएको छ । 


जारी आदेशमा सबै प्रकारका सभा, सम्मेलन, पार्टी प्यालेस, सिनेमा हल, डान्स बार, नाचघर, स्विमिङ पुल, मनोरञ्जन स्थल, सङ्ग्रहालय, रङ्गशालामा हुने दर्शकसहितका खेलकुद तथा मानिसको भिडभाड हुने अन्य कार्यक्रम गर्न–गराउन नपाइने विगतको व्यवस्थालाई कायम राखिएको छ ।


यस्तै खुला स्थानमा मानिस भेला हुन, सभा–जुलुस गर्न, जात्रा महोत्सव, भोजभतेर आदि गर्न–गराउन नपाइने तथा नित्य पूजाबाहेकका धार्मिक एवं सांस्कृतिक कार्यक्रम, भौतिक उपस्थितिमा हुने पठनपाठनका पनि गर्न नपाइने आदेशमा उल्लेख छ । 


औषधि तथा स्वास्थ्यसम्बन्धी पसल भने जुनसुकै बेला खोल्न सकिने छ तर अन्य पसल, व्यवसाय भने साँझ ७ बजेसम्म मात्रै खोल्न पाइने छ । स्थानीय ढुवानीका साधन बिहान ९ देखि ११ र अपराह्न ४ देखि ७ बजेसम्म मात्र सञ्चालन गर्न पाइने छ । व्यवसाय सञ्चालन गर्दा भने स्वास्थ्य मापदण्ड पालना गर्नुपर्ने काठमाडौँ प्रशासनले जनाएको छ । 


अत्यावश्यक वस्तुको अनलाइन अर्डर, रेस्टुराँ तथा फाष्टफुड तथा अन्य अर्डरको हकमा टेक–अवे वा होम डेलिभरी प्रयोजनका लागि साँझ ७ बजेसम्म मात्र सञ्चालन गर्न पाइनेछ । 


सिट क्षमताअनुसारको यात्रु राखेर यातायातका साधन सञ्चालन गर्न सकिने तर त्यसरी सञ्चालन गर्दा स्वास्थ्यका मापदण्ड पूर्ण पालना गर्नुपर्ने छ । टेम्पु र नीलो माइक्रोमा यसअघि लागू भएको नौ जना मात्रै यात्रु राख्न पाइने र यात्रुको बिचमा प्लास्टिकको छेकबार लगाउनुपर्ने व्यवस्थालाई कायम गरिएको छ । 

सम्बन्धित