इन्द्रावती तेश्रो जलविद्युत आयोजनाको उत्पादन फेरि बन्द
सिन्धुपाल्चोक । शनिवारदेखि आएको निरन्तरको बाढीले सिन्धुपाल्चोकको मेलम्ची–९ मा रहेको इन्द्रावती तेस्रो जलविद्युत आयोजनाको उत्पादन फेरि बन्द भएको छ ।
७.५मेगावाट क्षमताको आयोजनाको ६६ केभीको ३२ र ३३ नम्रका २ वटा टावरमा आइतबार राति क्षति पुगेपछि आयोजनाको उत्पादन फेरि बन्द भएको हो ।
असार १ गतेको याँग्री खोलाको बाढीले क्षति पुगेपछि गत बुधवार मात्र डेढ महिनामा सञ्चालनमा आएको उक्त आयोजनाको उत्पादन आइतबार राती १०ः००बजेदेखि बन्द भएको आयोजनाका केन्द्र प्रमुख मानोलक श्रेष्ठले जानकारी दिनुभयो ।
सिन्धु खोलामा एउटा टावर बगाएको र एउटा भाँचिएको छ । यसको मर्मत गर्न सहज अवस्था भए कम्तीमा १५ दिन लाग्ने केन्द्र प्रमुख श्रेष्ठले जानकारी दिनुभयो ।
यता निरन्तरको वर्षाले बिजुलीको खम्बा, ट्रान्सफर्मर र ११ केभिको लाइनमा समेत क्षति पुग्दा मेलम्ची क्षेत्रमा अहिले बिद्युत् अवरुद्ध भएको छ ।
नेपाल विद्युत् प्राधिकरण हेलम्बु मेलम्ची वितरण केन्द्र अन्तर्गत मेलम्ची, हेलम्बु, पाँचपोखरी थाङपाल र इन्द्रावतीका धेरै स्थानमामा बिद्युत् सेवा अवरुद्ध भएको छ ।
इन्द्रावती तेस्रो जलविद्युत आयोजनाको उत्पादन बन्द भएको र बाहुने पाटी, फट्टे, सिमखेतदेखि तालामाराङ तथा हेलम्बुको ग्याल्थुम, चनौटे, किउल लगायतका क्षेत्रमा बिजुलीको खम्बा, ट्रान्सफर्मर र ११ केभिको लाइनमा समस्या रहेकाले बिद्युत् सुचारु हुन केही समय लाग्ने हेलम्बु मेलम्ची वितरण केन्द्र प्रमुख माधव न्यौपानेले जानकारी दिनुभयो ।
बाँकी रहेको बाटोघाटो, पक्की तथा झोलुङ्गे पुलहरू समेत बाढीले बगाउँदा मर्मत सम्भार र पुनः निर्माण झन् कठिनाईपुर्ण रहेकोले समय लाग्ने उहाँले बताउनुभयो ।
छिमेकी वितरण केन्द्रहरूसँगको समन्वयमा वैकल्पिक रुटबाट सम्भव भएसम्म बिद्युत् सुचारु गर्न प्रयास भइरहेकोले परिस्थितिको गाम्भिर्यतालाई बुझी केही समय धैर्य गरिदिनु ग्राहक वर्गमा उहाँले अनुरोध गर्नुभयो ।
वैकल्पिक रुटबाट ल्याइएको बिद्युत् पूर्ण क्षमताको नहुने अर्थात् कम भोल्टेज आउने स्थानीयको गुनासो छ । अहिले मेलम्ची बजारमा वैकल्पिक रुटबाट ल्याइएको बिद्युत् परीक्षण भइरहेको केन्द्र प्रमुख न्यौपानेले जानकारी दिनुभयो ।
प्रतिक्रिया राख्नुहोस्