निषेधाज्ञा खुकुलो भएसँगै बागलुङमा कोरोना सङ्क्रमितको सङ्ख्या बढ्यो
बागलुङ । बागलुङमा जारी निषेधाज्ञा खुकुलो भएसँगै कोरोना सङ्क्रमितहरूको सङ्ख्या बढ्दै गएको छ ।
निषेधाज्ञाको समयमा केही घटेको कोरोना संक्रमणदर निषेधाज्ञा खुकुलो पारिएसँगै फेरी बढ्दै गएको हो ।
पछिल्लो २४ घण्टामा (बुधवार दिउँसो १२ बजेसम्म ) बागलुङमा ६५ जना संक्रमित थपिएका छन् ।
योसँगै बागलुङमा सक्रिय सङ्क्रमितको सङ्ख्या ३ सय ५९ पुगेको छ ।
स्वास्थ्य कार्यालय बागलुङका अनुसार पछिल्लो २४ घण्टामा ५१ जना पिसिआर परीक्षण र १४ जनामा एन्टीजेन परीक्षण गर्दा कोरोना संक्रमण देखिएको हो ।
पिसिआर विधिबाट गरिएको परीक्षणमा बागलुङ नगरपालिकामा ४१ जना, ढोरपाटन नगरपालिकामा १ जना, जैमिनी नगरपालिकामा १ जना निसीखोला गाउँपालिकामा २ जना र काठे खोला गाउँपालिमा ३ जना र अन्य ३ जना गरी ५१ जना रहेका छन् ।
एन्टीजेनबाट गरिएको परीक्षणमा बरेङ गाउँपालिकामा ६ जना, ढोरपाटन नगरपालिकामा ३ जना, गलकोट नगरपालिकामा २ जना, तारा खोला गाउँपालिकामा २ र तमानखोला गाउँपालिकामा १ जना संक्रमित देखिएका छन् ।
कोरोना संक्रमण केही घटेको समयमा निषेधाज्ञा खुकुलो पारिएपछि पुनः सङ्क्रमितको सङ्ख्या बढ्न थालेको स्वास्थ्य कार्यालय बागलुङका कोभिड-१९ फोकल पर्सन देवप्रकाश घिमिरेले बताउनुभयो ।
अस्पतालमै पुगेर परीक्षण गराउनेको सङ्ख्या पनि बढेको उहाँको भनाई छ ।
प्रतिक्रिया राख्नुहोस्