जुम्लामा १०५ जना प्रहरीको दरबन्दी खाली 

जुम्ला ।  जुम्लामा दरबन्दी अनुसार प्रहरी जनशक्ति नहुँदा सुरक्षा चुनौती बढ्दै गएको छ ।

कर्णाली प्रदेशको राजधानी सुर्खेत पछिको दोस्रो ठुलो सहर जुम्लामा दरबन्दी अनुसार प्रहरी जनशक्ति नहुँदा सुरक्षा चुनौती बढ्दै गएको हो ।

जुम्लाको कठ्याग्रिदो चिसोमा एक जना प्रहरीले दैनिक १८ घण्टासम्म ड्युटी गर्नुपर्ने बाध्यता छ ।

थोरै सङ्ख्यामा रहेका प्रहरीले ओभर टाइम ड्युटी गरेर पनि जिल्लामा शान्ति सुरक्षा मजबुत गरिरहेका छन् । स्वयम आफै असुरक्षित भएर दैनिक १८ घण्टा ड्युटी गरेर नागरिकको सुरक्षामा खटिरहेको डिएसपी माधव प्रसाद काफ्लेले बताउनुभयो ।

उहाँले भन्नुभयो,“जुम्लामा प्रहरीको जम्मा दरबन्दी ३ सय ५० जनाको हो । तर हाल कार्यरत २ सय ४५ जना मात्रै छन् । भने, १ सय ५ जना सुरक्षाकर्मीको दरबन्दी वर्षौँदेखि खाली छ । जसका कारण पर्याप्त सुरक्षाकर्मी खटाउन सकस भएपछि सुरक्षा चुनौती बढेको हो ।”

प्रदेश राजधानी पछिको दोस्रो ठुलो सहर जुम्लामा जनघनत्वसँगै सहरीकरण पनि बढ्दै गएको छ । तर सुरक्षाकर्मी घट्दै छन् ।

हत्या, हिंसा, चोरी, डकैतीका घटना दैनिक बढिरहेका छन् । तर पनि न्यून जनशक्तिलाई  ओभर टाइम ड्युटी गराएर शान्ति सुरक्षाका लागि परिचालन गरिएको छ ।

जुम्लामा कार्यरत २ सय ४५ जना मध्ये १ सय ६५ जना सुरक्षाकर्मी जिल्लाभरिका २७ वटा प्रहरी चौकीमा कार्यरत छन् । भने, जिल्ला प्रहरी कार्यालयमा ८० जनाले मात्रै समग्र सदरमुकामको शान्ति सुरक्षा गरिरहेका छन् ।

डिएसपी काफ्ले भन्नुभयो,“ सदरमुकाममा हजारौँको सङ्ख्यामा हुने आन्दोलन प्रदर्शनलाई नियन्त्रण गर्न एक डेढ सय सुरक्षाकर्मी खटाउनुपर्छ । तर २०/३० जना पठाएर भिड नियन्त्रण गर्नु, शान्ति सुरक्षा कायम गर्न निकै सकस हुन्छ ।”

१८ जनाको दरबन्दी रहेको हाँडसिंजा इलाका प्रहरी कार्यालयमा नौ जना मात्रै कार्यरत छन् । भने, १० जनाको दरबन्दी रहेका जिल्लाका सबै अस्थायी प्रहरी चौकीमा ५÷६ जना मात्रै कार्यरत छन् । गाउँमा आगलागी, झैँ–झगडा भएको खण्डमा पनि सुरक्षा दिन सक्ने जनशक्ति नहुँदा समस्या भएको हाडसिंजा इलाका प्रहरी कार्यालयका प्रमुख बालकृष्ण विकले बताउनुभयो ।

जुम्लाका अधिकांश प्रहरी चौकी भाडाकै घरमा छन् । जिल्लामा रहेका २७ वटा प्रहरी चौकी मध्ये ११ वटा आफ्नै छन् । भने, ६ वटा विभिन्न कार्यालयसँग सम्बन्धित छन् । साथै १३ वटा चौकी भाडाकै घरमा बसेका छन् ।

ताम्ती, गोठिज्युला, उर्थुलगायत ९ वटा चौकी तत्कालीन रुपमा स्थानीय सरकार, बजार व्यवस्थापन समितिबाट सञ्चालन भए पनि अधिकांश प्रहरीकै आफ्नै भवन छैनन् । सुरक्षा जोखिम बढ्दै जाँदा विभिन्न निकाय तत्तकालिन सहयोग गरेर चौकी बसे पनि आफ्नै भवन नभएको डिएसपी काफ्लेको भनाई छ ।

हाल भाडामै बसिरहेका जिल्ला ट्राफिक कार्यालय, हाँकु, मणिसाँघु र चौथा प्रहरी चौकीको घर भाडा बापत मासिक रुपमा ६२ हजारका दरले वार्षिक रुपमा ७ लाख ४४ हजार रुपैयाँ भाडा तिर्ने गरेको जिप्रकाको लेखा शाखाले जनाएको छ ।

प्रमुख जिल्ला अधिकारी भुपेन्द्र थापाले वर्षौँदेखि भाडाकै घरमा बसेर पनि शान्ति सुरक्षामा खटिएका चौकीको आफ्नै भवन बनाउन आवश्यक पहल गर्ने बताउनुभयो ।

उहाँले भन्नुभयो, “एकातर्फ जिल्लाको सुरक्षा जनशक्ति कम, अर्कोतर्फ भाडाकै घरमा बस्नु पर्ने बाध्यतामा पनि अधिकतम रुपमा सुरक्षाकर्मी परिचालन गरी शान्ति सुरक्षा मजबुत बनाएका छौँ ।”