२०७९ साल असोज १९ गते बुधबार

तपाईँ सुन्दै हुनुहुन्छः

विपद् व्यवस्थापन कार्यमा जुट्न सुरक्षा निकायलाई निर्देशन

रेडियो नेपाल २०७७ असार ३० गते १०:१४

डोटी- बर्सातको समय शुरु भएदेखि जिल्लामा बाढीपहिरोले क्षति गर्न थालेका कारण विपद् व्यवस्थापनमा जुट्न यहाँका सुरक्षा निकायलाई तयारी अवस्थामा बस्न निर्देशन दिइएको छ । जिल्ला विपद् व्यवस्थापन समितिका संयोजक तथा प्रमुख जिल्ला अधिकारी भीमप्रसाद भट्टराईले विपद् प्रतिकार्यका लागि विभिन्न क्लस्टर बनाएर जिम्मेवारी बाँडफाँड गरिएको बताउनुभयो । उहाँले प्राकृतिक विपद्मा परेकाहरुको उद्धार तथा राहतका कार्यक्रमका लागि पनि पूर्वतयारी गरिएसँगै विपद् व्यवस्थापनमा जुट्नका लागि जिल्लाका तीनवटै सुरक्षा निकाय नेपाली सेना, नेपाल प्रहरी तथा सशस्त्र प्रहरीलाई ‘हाइअलर्ट’मा बस्न निर्देशन दिनुभएको हो ।

उहाँले भन्नुभयो, “जिल्लामा हप्तौँदेखि भारी वर्षा शुरु भएको छ, यहाँका कतिपय पालिका बाढी पहिरोको उच्च जोखिममा भएकाले कहीँ कतै कुनै समस्या भए तत्काल उद्धारमा खटिनका लागि सुरक्षा निकायलाई हाइअलर्टमा राख्न निर्देशन दिएको छु ।” त्यसैगरी जिल्ला प्रशासनले जिल्लामा प्राकृति विपद् व्यवस्थापनका पूर्वयोजना तयार गरेको छ । जिल्ला प्रशासन कार्यालयको जिल्ला विपद् व्यवस्थापन समितिको बैठकबाट विपद् प्रतिकार्यका योजना पारित गर्दै सोहीअनुसारका तयारी थालिएको जिल्ला प्रशासन कार्यालय डोटीले जनाएको छ । केही दिनयतादेखि परिरहेको अविरल वर्षाका कारण देशका विभिन्न स्थानमा ठूलो जनधनको क्षति भएकाले डोटीमा पनि विपद्बाट जोगिन प्राकृतिक विपद् व्यवस्थापनका पूर्वयोजना तयार गरिएको प्रमुख जिल्ला अधिकारी भट्टराईले जानकारी दिनुभयो ।

त्यसैगरी जिल्लाका नौवटै स्थानीय तहलाई विपद् प्रतिकार्य योजना बनाएर विपद्को पूर्वतयारी गर्न, नदी कटान, बाढीपहिरो तथा डुबान क्षेत्रको पहिचान गरी त्यहाँ बसोबास गर्दै आएका नागरिकलाई सुरक्षित स्थानमा राख्नका लागि जिल्ला प्रशासनले सबै स्थानीय तहमा पत्राचारसमेत गरेको छ । जिल्लामा सेतीनदी आसपास बानीडुग्रीसैन, गोपघाट, बारपाटा, सिरखोलीसैन, कालागाढ, गेरुपानी, दिपायल तथा नारिदाङलगायतका क्षेत्रलाई नदीको कटान तथा बाढीले क्षति गर्न सक्ने भन्दै उच्च जोखिममा राखिएको छ ।

विपद् तथा नदीबाट हुने खतराबाट जोगिन प्रशासनले २४सै घण्टा सुरक्षाकर्मीलाई ती क्षेत्रमा अनुगमन गर्न निर्देशनसमेत दिएको छ । जिल्लामा रहेका विभिन्न अन्य नदी तथा ठूला खोलामा पानीको सतह मापन गरिने उपकरण नभएका कारण नदी तथा खोलामा पानीको बहाव बढ्न थालेपछि सतर्कता अपनाउन स्थानीयवासीलाई प्रशासनले आग्रह गरेको छ । जिल्लामा हप्तौँदेखि वर्षा भइरहे पनि सबैजसो नदीमा पानीको बहाव समान्य अवस्थामै रहेको प्रमुख जिल्ला अधिकारी भट्टराईले जानकारी दिनुभयो ।

डोटी जिल्लामा भारी वर्षा शुरु भएसँगै बाढीपहिरोको त्रास फैलिएको छ । वर्षाकै कारण यहाँका विभिन्न ठाउँमा पहिरो गएको छ भने एक दजर्नभन्दा बढी ग्रामीण सडक अवरुद्ध हुँदा स्थानीयवासी, सुत्केरी तथा बिरामीलाई अस्पतालसम्म पु¥याउन समस्या भएको छ । वर्षाकै कारण केही दिन पहिले जिल्लाको सायल गाउँपालिका–२ सिर्मागाउँमा पहिरो जाँदा आठ परिवारका ४० जना विस्थापित भएका थिए । पूर्वीचौकी गाउँपालिकामा पहिरो जाँदा छ महिने एक शिशुको मृत्यु भएको थियो ।

सम्बन्धित