पश्चिम बंगालले गर्यो मेची नाका सिल, आयात निर्यात पुर्णरुपमा ठप्प

झापा । महामारीको रुपमा फैलिरहेको कोरोना भाइरस संक्रमणको जोखिम देखाउँदै भारतको पश्चिम बंगाल सरकारले नेपालसँग जोडिएको झापाको काकरभिट्टास्थित मेची भन्सार नाका बन्द गरेको छ ।

यस संगै नेपालको पूर्वी नाकाबाट आयात निर्यात पुर्णरुपमा ठप्प भएको छ ।

बंगाल सरकारले भारतीय भन्सार कार्यालयलाई पत्राचार गर्दै अनिश्चित कालका लागि कारोवार रोक्न निर्देशन दिएको मेची भन्सार कार्यालयका प्रमुख ध्रुवराज विश्वकर्माले जानकारी दिनुभयो ।

भारततर्फको नाका बन्द भएपछि भारत, भुटान र बंगलादेशबाट नेपालमा हुने आयात पुर्णरुपमा ठप्प भएको उहाँले बताउनुभएको छ ।

यसभन्दा अघि लकडाउनको समयमा पनि सो नाका भएर ग्यासको बुलेट, तरकारी, फलफूल बोक्ने कन्टेनर भित्रिने गरेको उहाँले जनाउनुभयो ।

उहाँका अनुसार पश्चिम बंगाल भन्सार विभागका जोइन्ट कमिसनर एसके मोहापात्रले अवस्था सामान्य नभएसम्म भारतबाट वस्तु निर्यात गर्न नसकिने बताएका छन् ।

नाकामा आएर थन्किएका बस्तुलाई रि–रुट गरी अन्य नाकाबाट पठाउन मोहापात्रले भारतीय भन्सारका अधिकारीलाई निर्देशन पनि दिएको विश्वकर्माले बताउनुभयो ।

नाका खोल्न कुटनीतिक पहल सुरुः
यता केन्द्र सरकारको नीतिविरुद्ध राज्य सरकारबाट नाका बन्द गरिएपछि नेपालले कुटनीतिक पहल थालेको भन्सार विभागले जनाएको छ ।

परराष्ट्र र वाणिज्य मन्त्रालय हुँदै भारतीय दूतावासलाई नाका बन्दबारे पत्राचार गरिएको छ ।

दिल्लीस्थित नेपाली दूतावासबाट समेत पहल थालिएको जानकारी आफूलाई आएको मेची भन्सार प्रमुख विश्वकर्माले बताउनुभयो ।