आठ सय बढी विपन्न परिवारलाई राहत वितरण

सल्यान । जिल्लाको शारदा नगरपालिकाले आठ सय बढी विपन्न परिवारलाई राहत वितरण गरेको छ ।

वडाका जनप्रतिनिधिहरुले सर्वेक्षण गरी पहिचान गरेका अति विपन्न र साहारा बिहिन आठ सय बढी परिवारलाई राहत वितरण गरिएको नगरपालिकाले जनाएको छ ।

दैनिक जीविकोपार्जन गर्न नसक्ने, अति विपन्न, एकल महिला, जेष्ठ नागरिक, अपांगता भएका, ज्याला मजदुरी गरी दैनिकी चलाउने परिवार पहिचान गरी राहत वितरण गरिएको नगरप्रमुख सुरेश अधिकारीले बताउनुभयो ।

राहत सामाग्रीको दुरुपयोग नहोस् र बास्तविक बिपन्न परिवार नछुटोस् भन्ने नगरपालिका सचेत रहेको उहाँको भनाई छ ।

नगरपालिकाका १५ वटै वडामा सञ्चालन गरिएको राहत वितरण अभियानबाट समस्यामा सरकार छ भन्ने कुराको जनतालाई बोध गराउन सफल भएको नगरप्रमुख अधिकारीले बताउनुभयो ।

उहाँले विश्वभर फैलिएको कोरोना भाइरस ( कोभिड १९) ले सन्त्रास बढी रहेको सन्दर्भमा सबैलाई लकडाउनको पूर्ण पालना गरी विदेशबाट आएका व्यक्ति नगरपालिकाले स्थापना गरेको क्वारेनटाइनमा बसी दिन आग्रह समेत गर्नुभएको छ ।

लकडाउनले दैनिक कामकाज गरेर पेट पाल्ने परिवार काम नहुँदा भोकै बस्न नपरोस भनी विपन्न परिवारलार्य राहत वितरण गरिएको निमित्त प्रमुख प्रशासनिकय अधिकृत लिला बहादुर बबालले बताउनुभयो । कोही विपन्न परिवार नदोहोरियोस न नछुटोस भनेर वडागत रुपमा तथ्यांक संकलन गरिएको छ उहाँले भन्नुभयो ।