चितवनमा लकडाउन उल्लंघन गर्ने १९३ वटा सवारी नियन्त्रणमा

चितवन। कोराना रोकथामको लागि सरकारले जारी गरेको लकडाउन को उल्लघन गरी अनावश्यक काममा बाहिर चलाईएका १९३ वटा सवारी साधनलाई प्रहरीले नियन्त्रणमा लिएको छ ।

आज बिहान १२ बजेसम्म भएको कारवाहीमा लकडाउनको जवरजस्ती उल्लंघन गर्ने र अटेर गर्ने १५ जनालाई कारवाहीको लागि जिल्ला प्रशासन कार्यालय पठाइएको छ । जिल्ला प्रहरी कार्यालय, चितवनका प्रवत्ता एकनारायण कोइरालाका अनुसार उल्लंघन गर्नेमा १सय ६८ वटा मोटरसाइकल, स्कुटर १० वटा , बलेरो गाडी २, म्याजिक वस, १, अटोरिक्सा ५, ट्रयाक्टर ३ र ट्रक २ वटा रहेका छन । ती मध्ये अधिकांशलाई एकपटकको लागि सम्झाई बुझाई पठाइएको र १५ जना सवारी चालकलाई कारवाहीको लागि पठाईएको हो ।

साथै चितवन प्रहरीले घरबाट अनावश्यक रूपमा निस्केका पैदल यात्रीलाई समेत सम्झाई बुझाई गरी घर फर्काईएको कोइरालाले जानकारी दिनुभयो । अत्यावश्यक सेवा र पासका सवारी साधन मात्रै चल्न पाउने, अन्य सवारी साधनलाई नचलाउन र सर्बसाधारणलाई घरबाट ननिस्कन समेत प्रहरीले आग्रह गरेको छ । कारवाही प्रक्रिया अघिबढेसंँगै मंगलबार भन्दा आज सडकहरु सुनसान देखिएका छन ।