आमाबाबुको हत्या अभियोगमा छोरा पक्राउ

कञ्चनपुर ।कञ्चनपुरको शुक्लाफाँटा नगरपालिका वडा नम्बर ११ कलुवापुरमा गत फागुन १४ गते राति भएको भण्डारी दम्पतीको हत्या प्रकरणमा आफ्नै छोरा पक्राउ परेका छन् । आफ्नो घरभित्रै मृत फेला परेका जयलाल भनिने जय बहादुर भण्डारी र उनकी कान्छी श्रीमती धना देवी भण्डारीको जयलालकी जेठी श्रीमती पट्टीका छोरा २६ वर्षीय भरत भण्डारीलाई प्रहरीले डडेल्धुराबाट पक्राउ गरेको जिल्ला प्रहरी कार्यालय कञ्चनपुरले सोमबार पत्रकार सम्मेलन गरी जानकारी दिएको छ । भण्डारी दम्पती हत्या प्रकरणमा उनकै छोरा भरतको संग्लनता देखिएकोले उनलाई पक्राउ गरी थप अनुसन्धान गरिरहेको जिल्ला प्रहरी कार्यालय कञ्चनपुरका प्रहरी उपरीक्षक मुकुन्द मरासिनीले जानकारी दिनुभएको छ ।

अनुसन्धानका क्रममा विभिन्न तथ्यका आधारमा पक्राउ परेका भरतले आफ्ना बुवा र सैतेनी आमाको हत्या आफूले गरेको स्वीकार गरी बयान दिएको बताइएको छ । फागुन १४ गते दिउँसो मोटरसाइकलको ट्रयल दिन डडेल्धुराबाट महेन्द्रनगर पुगेका भरत साँझ अत्तरिया पुगी पुनः फर्की राति कलुवापुर पुगेका थिए । सोही राति घरायसी वादविवाद हुँदा उनले आफ्नै बुवा र सौतेनी आमाको हत्या गरेको बयान दिएका छन् । जयलाल भण्डारीकि जेठी श्रीमतीको स्तन क्यान्सरबाट मृत्यु भएपछि दुई वर्षअघि उनलेे २२ वर्षीया धनासँग विवाह गरेका थिए । धनाबाट जन्मिएकी सात महिनाकी छोरी छन् । आमाबाबुको हत्यापछि बेवारिसे अवस्थामा फेला परेकी छ‍ोरीको धनगढी स्थित माया मेट्रो अस्पतालमा उपचार जारी रहेको बताइएको छ ।