कैलालीमा बस र अटोरिक्सा एक–आपसमा ठोक्किदा एक जनाको मृत्यु, चार घाइते

धनगढी । पूर्वपश्चिम राजमार्ग अन्तर्गत  कैलालीको चौकी डाँडामा आज बस र अटोरिक्सा एक-आपसमा  ठोक्किदा एक जनाको मृत्यु भएको छ । दुर्घटनामा अन्य चार जना घाइते भएका छन् ।

दुर्घटनामा परी अटोरिक्सामा सवार गोदावरी नगरपालिका–६ तुलेराम कोलीको मृत्यु भएको कैलालीका प्रहरी उपरिक्षक सुदीप गिरीले जानकारी दिनुभयो ।

गम्भिर घाइते कोलीको सेती प्रादेशिक अस्पताल धनगढीमा उपचारका क्रममा मृत्यु भएको उहाँले बताउनुभयो ।

महेन्द्रनगरबाट धनगढी आउँदै गरेको ना४ख ४५२८ न. को बस र विपरित दिशाबाट जाँदै गरेको से १ ह २११४ न.को अटोरिक्सा एक–आपसमा ठोक्किदा उक्त दुर्घटना भएको प्रहरीले जनाएको छ ।

दुर्घटनामा परी अटोरिक्सा चालक मानबहादुर बिक, नखरी कोली, अर्जुन कोली, दुर्गा कोली घाइते भएका छन् ।

घाइते सबैको पदमा अस्पताल अतरिया उपचार भइरहेको प्रहरीले जनाएको छ । प्रहरीले बस र बसका चालकलाई नियन्त्रणमा लिएको छ ।