मकवानपुरमा प्राविधिक आउनु पुर्व बनेका दुईसय ३३ घरको पहिचान
मकवानपुर – मकवानपुर जिल्लामा २०७२ सालको भुकम्पका कारण क्षति भएका मध्ये प्राविधिक आउनु पुर्व बनेका निजि आवासहरुको पहिचान गरिएको छ ।
भुकम्पपछि जिल्लामा प्राविधिक आउनु पुर्व बनेका त्यस्ता निजि आवासको संख्या २ सय ३३ पहिचान भएका छन् ।
भुकम्प पुननिर्माण प्राधिकरण जिल्ला आयोजना कार्यान्वयन ईकाईका प्रमुख बिमल किशोर केपीका अनुसार भुकम्पपछि लगतै स्थानीय तहमा प्राविधिक खटिनु÷पुग्नु अगावै भुकम्प पीडित स्वयमले निर्माण गरेको निजि आवास जिल्लामा २ सय ३३ पहिचान भएका हुन् ।
मकवानपुरका १० स्थानीय तह मध्ये भीमफेदी र बागमती गाउँपालिकामा एउटा पनि निजि आवास बनेका छैनन् भने हेटौंडा उपमहानगरपालिकामा ३५ र थाहा नगरपालिकामा ५१ वटा निजि आवासबनेको पाईएको हो ।
त्यस्तै बकैया गाउँपालिकामा ४६, मकवानपुरगढीमा ३२, मनहरीमा ४१, कैलाशमा १३, राक्सिराङमा ८ र ईन्द्रसरोवर गाउँपालिकामा ७ गरि कुल २ सय ३३ निजि आवास निर्माण भएको पाईएको हो । केन्द्रिय आयोजना ईकाईले माग गरे अनुसार जिल्ला आयोजना कार्यान्वयन ईकाईले बिवरण पठाएको र यसका बारेमा केन्द्रले निर्णय गर्ने समेत केपीले जानकारी दिनुभयो ।
जिल्लामा पहिचान भएका ३ हजार ४ सय १६ पुनर्निर्माण लाभग्राही मध्ये हालसम्म २७ हजार ८ सय ३४ को अनुदान सम्झौता भएको छ । जस मध्ये १६ हजार ७ सय ७९ जनाले तेस्रो किस्ता प्राप्त छन् भने १४ हजार १ सय ३५ जनाले घर निर्माण सम्पन्न गरेका छन् ।
जिल्लामा अझै पनि ६ हजार ४ सय ८२ जनाको अनुदान सम्झौता हुन बाँकी रहेको प्रमुख केपीले जानकारी दिनुभयो ।
प्रतिक्रिया राख्नुहोस्