लकडाउन अझै आवश्यक रहेको उच्चस्तरीय समन्वय समितिको ठहर

कोभिड १९ सम्बन्धी उच्चस्तरीय समन्वय समितिले समाजमा कोरोनाको संक्रमण फैलन नदिन जारी लकडाउनले सहयोग गरेकोले यसको उपादेयता अझै पनि रहेको ठहर गरेको छ ।

उच्चस्तरीय समन्वय समितिको आइतबार बसेको २५ औ बैठकले लकडाउनलाई निरन्तरता दिनु आवश्यक भएको ठहर गरेको समितिका सदस्य सचिव एवं प्रधानमन्त्री कार्यालयका सचिव नारायणप्रसाद विडारीले जानकारी दिनु भयो ।

बैठकले लकडाउनको बेला शान्ति सुरक्षालाई व्यवस्थित गर्ने, अत्यावश्यक वस्तुहरुको आपूर्तिलाई नियमित गर्ने र क्वरेन्टाइनहरुलाई मापदण्ड अनुसार सञ्चालन गर्न स्थानीय पालिकाहरुलाई आवश्यक सहयोग गर्ने निर्णय पनि गरेको छ ।

बैठकका निर्णयहरु र लकडाउनको आवश्यकता र औचित्यका बारेको समितिको सिफारिश मन्त्रिपरिषद बैठकमा पेश भई आवश्यक निर्णय हुनेछ ।

सरकारले यसअघि जेठ ५ गतेसम्म लकडाउन कायम राख्ने निर्णय गरेको थियो ।